Suraxani rayonunda qanunsuz tikinti məsələləri

Suraxani rayonu, Yeni Suraxani qəsəbəsi Samir Əliyev mərkəzi küçə 9 unvanında, 316 saylı orta məktəbin yanında yerləşən, təxminən 25-30 sot torpaq sahəsində qanunsuz tikinti işlərinin aparılması ilə bağlı daha öncə məlumat vermişdik. Həmin ərazidə ticarət məqsədilə tikinti işlərinin başlaması barədə ictimaiyyətə məlumat çatdırmışdıq. Bir sıra aidiyyəti dövlət qurumlarına müraciət etmişdik. Bakı şəhərinin inzibati ərazisində tikinti obyektlərinin tikintisinə və istismarına icazələrin verilməsinə birbaşa cavabdeh olan Dövlət Şəhərsalma və Arxitektura Komitəsi, göstərilən ünvanda tikinti işlərinin aparılmasına göz yummuşdur.

Məlum olduğu kimi, Suraxani rayon İcra Hakimiyyətində kadr dəyişiklikləri olub. 8 iyul 2024-cü ildən Prezident İlham Əliyevin sərəncamı ilə başçı vəzifəsinə Adil Əliyev təyin edilib. Aldığımız məlumatlara görə, Adil Əliyev vəzifəyə keçən zaman Suraxanıda qanunsuz tikililərin sayı artıb. Məlumata görə, o, başçı təyin olunduqda özü ilə yüzə yaxın adam gətirərək, Suraxanıda qanunsuz tikililərin aşkarlanmasını tapşırıb. Hətta onlara qeyri-rəsmi maaş da verir. Burada məqsəd qanunsuz tikililərin aşkarlanaraq dayandırılması deyil, onların başqa yollarla leqallaşdırılmasıdır.

Adil Əliyev Suraxani rayon İcra Hakimiyyətinin başçı təyin edildikdən sonra, Yeni Suraxani qəsəbəsi Samir Əliyev mərkəzi küçə 9 unvanında, 316 saylı orta məktəbin yanında yerləşən, təxminən 25-30 sot torpaq sahəsində yenə qanunsuz tikinti işlərinə başlanılıb. Yəni, əvvəlki başçının daş qoyduğu torpağa Adil Əliyev də daş qoymağa başlayıb.

Aktualinfo.org bir daha xatırladır ki, sözügedən ərazidə qanunsuz tikinti işlərinin aparılmasına bir neçə il əvvəldən toxunmuşdu. Bir daha qeyd etmək istərdik ki, tikintiyə sənədləri hansı dövlət qurumunun, Suraxani rayonu İcra Hakimiyyətinin yoxsa Dövlət Şəhərsalma və Arxitektura Komitəsinin verməsi belli olmadığını vurğulamışdıq. Əslində, tikinti icazəsinin adıçəkilən qurumların birgə rəy əsasında verildiyini oxucuların diqqətinə çatdırmışdıq. Onu da əlavə etmişdik ki, tikinti işləri sözügedən ərazidə istismar müddəti bitmiş neft quyularının üstündə aparılır. SOCAR-ın ərazisində tikinti icazəsinin hansı qurum tərəfindən verildiyinə aydınlıq gətirilməsini istəmişdik.

Sözügedən məqalədə göstərilən ərazidə tikinti işlərinin aparılmasına münasibət bildirən SOCAR Təhlükəsizlik İdarəsinin rəsmi redaksiyanın əməkdaşına zəng edərək bildirmişdi ki, həmin ərazinin SOCAR-a heç bir aidiyyəti yoxdur. Ərazi ola bilsin ki, əvvəllər Neft Sirkətinə məxsus olub. Lakin orada çoxsaylı evlər və məktəb tikildiyindən, qurum rəsinin sözlərinə görə, ərazi artıq İcra Hakimiyyətinin balansına verilib.

Qeyd etdiyimiz kimi, ərazi həm istismar müddəti bitmiş neft quyuları ilə əhatə olunub, həm də yaxınlığında orta ümumtəhsil məktəbi yerləşir ki, belə bir ərazidə hər hansı ticarət obyektinin tikintisi yalnız şəhərsalma planlarına və normalarına uyğun şəkildə aparılmalıdır. Bunu ötən yazılarda da qeyd etmişdik və bir daha xatırladırıq ki, müvafiq icra hakimiyyəti və yerli özünüidarəetmə orqanları ilə birlikdə mskunlaşmış ərazilərin mövcud təbii və geoloji şəraitinin yararlı olması nəzərə alınmaqla, onların inkişaf istiqamətlərini və memarlıq-planlaşdırma strukturlarını müəyyən etmək; müvafiq icra hakimiyyəti orqanları ilə birlikdə mskunlaşma ərazilərinin və sistemlərinin təhlükəli təbii proseslərdən və hadisələrdən mühafizəsi üçün tədbirlərin hazırlanmasında iştirak etmək; müvafiq sahədə öz səlahiyyətləri daxilində layihələndirmə prosesində müəssisə və təşkilatlar arasında baş verən fikir ayrılığını araşdırmaq və müvafiq qərar qəbul etmək Dövlət Şəhərsalma və Arxitektura Komitəsinin birbaşa vəzifələrinə aiddir. Lakin proseslərin gedişindən də göründüyü kimi, Dövlət Şəhərsalma və Arxitektura Komitəsi ərazidə bu qanunsuz tikinti işinin aparılmasına israr edir.

Qeyd etdik ki, ərazidə qanunsuz tikinti işlərinin kimlər tərəfindən başladıldığını öyrənməyə çalışdıq. Lakin heç bir məlumat əldə edə bilmədik. Yalnız onu öyrəndik ki, tikinti işlərinə Adil Əliyevin qeyri-rəsmi tapşırığından sonra başlanılıb. Ümid edirik ki, Dövlət Şəhərsalma və Arxitektura Komitəsinin sədri Anar Quliyev Suraxani rayonu, Yeni Suraxani qəsəbəsi Samir Əliyev mərkəzi küçə 9 unvanında, 316 saylı orta məktəbin yanında yerləşən torpaq sahəsində tikinti işlərinin aparılmasına verilmiş icazəyə aydınlıq gətirilməsi üçün göstəriş verəcək.

Aktualinfo.org