Bakı, Azərbaycan – 6 dekabr 2023

Azərbaycan Demokrat Partiyasının fəal üzvü kimi tanınan Hikmət Zülfəliyev ötən gün Bakı şəhərinin Yasamal rayonunda yerləşən yaşadığı məhəlləyə daxil olarkən naməlum şəxslərin fiziki hücumuna məruz qalıb. Onun bildirdiyinə görə, hücum edən şəxslər siyasi fəaliyyətinə görə onu təhdid edib, təhqir və döyüblər.

“Dövlət əleyhinə təbliğata görə cavab verəcəksən”

Hadisənin şahidi olan Zülfəliyev deyir ki, iki nəfər üzünü tanımadığı şəxs ona yaxınlaşaraq “nəyə görə insanlar arasında dövlətə qarşı təbliğat aparırsan?” deyə suallar verib. O, hakimiyyəti deyil, sistemdəki problemləri tənqid etdiyini desə də, dərhal fiziki təzyiqə məruz qalıb.

“Məni əvvəlcə söydülər, sonra isə qəfil yumruqla vurmağa başladılar. Yerə yıxıldım, qışqırdım. Qonşulardan biri səsimi eşidib yaxınlaşmasaydı, nə olacağını bilmirəm,” – deyə Zülfəliyev bildirib.

Yaxınlıqdakı vətəndaşların müdaxiləsindən sonra o, yaxınlıqdakı poliklinikaya aparılıb, orada ilkin tibbi yardım alaraq evə buraxılıb.

Zərərçəkən: “102-yə zəng etdim, heç kim gəlmədi”

Zülfəliyev hadisədən dərhal sonra Daxili İşlər Nazirliyinin 102 xidmətinə zəng etdiyini, lakin hadisə yerinə heç bir polis əməkdaşının göndərilmədiyini qeyd edir. O, bu vəziyyəti özünün uzun müddətdir izlənməsi və siyasi fəaliyyətinə görə bilərəkdən görməməzliyə vurulması kimi qiymətləndirir.

“Polisə zəng etdim, amma nə gələn oldu, nə maraqlanan. Bu artıq təsadüf deyil, bu sistemli səssizlikdir,” – deyə o əlavə edib.

Hüquq müdafiəçiləri məsələni nəzarətə götürür

Yerli hüquq müdafiəçiləri Zülfəliyevin döyülməsi ilə bağlı araşdırmalara başlanmasını tələb edir. Onlar hesab edirlər ki, bu cür hadisələr təkcə bir vətəndaşın sağlamlığına deyil, ümumilikdə ictimai azadlıqlara yönəlmiş təhdiddir.

Hadisə ilə bağlı həkim arayışı və ilkin tibbi sənəd hüquqi strukturlara təqdim olunub. Lakin indiyədək rəsmi qurumlardan heç bir açıqlama verilməyib.

⸻

Zülfəliyev əlavə edib ki, bu təhdidlərə baxmayaraq siyasi fəaliyyətindən geri çəkilməyəcək və hüquqi mübarizəsini davam etdirəcək.