Azərbaycanda Mədəniyyət Nazirliyinin tabeliyində fəaliyyət göstərən "Əsaslı Tikinti və Tədarük" MMC, 2025-ci il 8 iyul tarixində Tovuz rayonunda yerləşən Mədəniyyət Mərkəzinin əsaslı təmir işlərinin satın alınması məqsədilə açıq tender keçirib. Tender nəticəsində "Təmir-Təchizat-4" Məhdud Məsuliyyətli Cəmiyyəti qalib seçilib. Tenderdə 380.507,52 manat dəyərində satın alma müqaviləsinin bağlanılması planlaşdırılır. Bu məlumat 02.09.2025-ci ildə satınalmalar portalında dərc edilib.
Mədəniyyət Nazirliyinin "Əsaslı Tikinti və Tədarük" MMC-nin satınalma müqaviləsi bağlamaq istədiyi "Təmir-Təchizat-4" şirkəti, bir neçə il əvvəl tender bazarının fəal iştirakçılarından biri olub. MMC 2021-2023-cü illər ərzində Qaradağ rayon İcra Hakimiyyətinin və Aparatın Mənzil-Kommunal Təsərrüfatı İstehsalat Birliyinin keçirdiyi yolların əsaslı təmir işlərinin satın alınması üzrə tenderlərin qalibi olmuşdur. Medianın yaydığı xəbərlərə görə, MMC Lökbatanın abadlaşdırılmasına ayrılan dövlət vəsaitlərini satınalmalar yolu ilə yönləndirməklə məşğuldur.
Kommersiya qurumunun hüquqi şəxslərin dövlət reyestrinə daxil edilmiş məlumatlarında "Təmir-Təchizat-4" (VÖEN: 3100165181) Məhdud Məsuliyyətli Cəmiyyətinin Dövlət Vergi Xidmətinin Bakı şəhəri Lokal Gəlirlər Baş İdarəsində 04.05.2005-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanı Bakı şəhəri, Nizami rayonu, Rızvan Teymurov, ev.10/4, qanuni təmsilçisinin adı Həsənov Elburus Məmməd oğludur.
Vergi öhdəlikləri üzrə 2006-2020-ci illərdə Vergi Məcəlləsinə uyğun olaraq vergi hesabatını vaxtında təqdim etməməyə görə MMC-yə dəfələrlə maliyyə sanksiyası tətbiq edilmişdir. Dövlət Vergi Xidmətinin məlumatlarında MMC passiv vergi ödəyicisi kimi göstərilir. Qeyd edək ki, vergi ödəyicisinin eyniləşdirmə nömrəsi (VÖEN) hüquqi və ya fiziki şəxsin vergi ödəyicisi olduğunu təsdiq edən sənəddir. Vergi ödəyicilərinin uçotu, onlara dövlət vergi orqanları tərəfindən verilmiş VÖEN əsasında aparılır. VÖEN aktiv və ya passiv ola bilər. Vergi ödəyicisi fəaliyyətini dayandırırsa, onun VÖEN-i passivləşdirilir.
Buna görə, Mədəniyyət Nazirliyinin "Əsaslı Tikinti və Tədarük" MMC-nin son üç il ərzində sahibkarlıq subyekti kimi fəaliyyətini dayandırmış "Təmir-Təchizat-4" MMC ilə satınalma müqaviləsini hansı əsaslarla bağlamaq istədiyi sual doğurur. Azərbaycanın İqtisadiyyat Nazirliyinin vahid reyestr məlumatlarına görə, MMC-nin müvafiq sahə üzrə tələb olunan lisenziya və icazələri barədə heç bir məlumat yoxdur.
Bununla yanaşı, "Dövlət Satınalmaları Haqqında" Azərbaycan Respublikası Qanununda tədarükçülərin uyğunluq göstəriciləri müəyyən edilib. Həmin qanuna görə, tədarükçünün "Lisenziyalar və icazələr haqqında" Azərbaycanın Qanunu ilə tələb olunduqda, müvafiq sahibkarlıq fəaliyyətinin həyata keçirilməsi üçün müvafiq lisenziyaya malik olması vacibdir. Sahibkar fəaliyyətini dayandırmış şəxslərin satınmalarda iştirak etməsi isə yolverilməzdir. Mədəniyyət Nazirliyinin "Əsaslı Tikinti və Tədarük" MMC-nin nümayəndələri, "Təmir-Təchizat-4" MMC-nin uyğunluq göstəricilərini qiymətləndirərkən qanunsuzluqları niyə görmədiklərini sual edir.
Qeyd edək ki, Mədəniyyət Nazirliyinin tabeliyində təsis edilmiş "Əsaslı Tikinti və Tədarük" MMC, Nazirlər Kabinetinin 15 oktyabr 2022-ci il tarixli qərarı ilə yaradılıb. MMC-nin direktoru Vəliyev Rafiq Mustafa oğludur. O, həm də ölkəmizdə fəaliyyət göstərən yaradıcı şirkətlər, təşkilatlar, assosiasiyalar və birlikləri birləşdirən, müasir iqtisadiyyatın əsas aparıcı sahələrindən biri olan yaradıcı biznes və sənayelərin inkişafı məqsədilə 2021-ci ildən təsis olunmuş Azərbaycan Yaradıcı Sənayelər Federasiyasının üzvüdür.
Medianın yazdıqlarına görə, bu dövrdə "Əsaslı Tikinti və Tədarük" MMC, Azərbaycan Yaradıcı Sənayelər Federasiyasının ən bahalı tenderlərini 4-5 şirkətə verib, onlardan biri isə Rafiq Vəliyevin rəhbərlik etdiyi "FIL AGENCY" MMC-dir.
