Oktyabrın 17-də, Bakının Qaradağ rayonu, Lökbatan qəsəbəsində yerləşən Heydər Əliyev Mərkəzində "Müstəqilliyin bərpasından tam suverenliyə gedən yol" mövzusunda dəyirmi masa təşkil olunub. Bu tədbir 18 Oktyabr – Müstəqilliyin Bərpası Günü münasibətilə keçirilib. Təşkilatçılar arasında Yeni Azərbaycan Partiyası (YAP) Qaradağ rayon təşkilatı, Qaradağ Rayon İcra Hakimiyyəti, 21 saylı Mediasiya Təşkilatı və Heydər Əliyev Mərkəzi yer alır.
Tədbirdə iştirak edənlər öncə Ulu Öndər Heydər Əliyevin abidəsi önünə gül dəstələri qoyaraq, onun xatirəsini ehtiramla yad ediblər. Daha sonra, sərgi zalında Ulu Öndərin zəngin həyat və dövlətçilik fəaliyyətini əks etdirən stendlərlə tanış olub. Azərbaycanın Dövlət Himninin sədaları altında başlayan tədbirdə, Ulu Öndər Heydər Əliyevin və ölkənin ərazi bütövlüyü uğrunda canından keçən şəhidlərin xatirəsi bir dəqiqəlik sükutla yad edilib.
Tədbirdə "Müstəqilliyin bərpasından tam suverenliyə gedən yol" adlı videoçarx nümayiş etdirilib. YAP Qaradağ rayon təşkilatının sədri Qafar Əliyev çıxış edərək, Azərbaycan xalqının müstəqillik uğrunda apardığı uzun və çətin mübarizə yolundan danışıb. O, qeyd edib ki, 1918-ci ildən fəaliyyətə başlamış Azərbaycan Xalq Cümhuriyyəti, ilk demokratik respublika olub, lakin yalnız 23 ay yaşamışdır. 1920-ci ildə bolşeviklərin işğalı nəticəsində süqut edib və 1922-ci ildən Azərbaycan SSRİ-nin tərkibinə daxil edilib.
Qafar Əliyev, XX əsrin sonlarında yaranmış tarixi şəraitin ölkəyə yenidən müstəqilliyini bərpa etməyə imkan verdiyini bildirib və bunun 1991-ci il oktyabrın 18-də gerçəkləşdiyini vurğulayıb. Lakin müstəqilliyin ilk illərində ölkədə xaos, iqtisadi tənəzzül və torpaq itkisi kimi ciddi problemlərin yaşandığını qeyd edib. Bu çətin dövrdə xalqın yeganə ümid yerinin Ulu Öndər Heydər Əliyev olduğunu bildirən Qafar Əliyev, məhz onun siyasi qayıdası ilə ölkədə sabitlik və inkişafın təmin edildiyini söyləyib.
Rayon təşkilatının sədri, son 22 ildə Prezident İlham Əliyevin rəhbərliyi altında Azərbaycanın sürətli inkişaf yoluna qədəm qoyduğunu və ərazi bütövlüyünün tam bərpa olunduğunu vurğulayıb. O, bütün bu uğurların Ulu Öndərin müəyyən etdiyi siyasi xəttin və onun Prezident İlham Əliyev tərəfindən uğurla davam etdirilməsinin nəticəsi olduğunu qeyd edib.
Tədbirdə digər natiqlər də çıxış edərək, Qaradağ Rayon İcra Hakimiyyətinin İctimai-siyasi və humanitar məsələlər şöbəsinin əməkdaşı Samirə Sixəliyeva, rayon Heydər Əliyev Mərkəzinin direktoru Çiğdem Əliyeva, Mediasiya Şurasının İdarə Heyətinin üzvü Sima Yaqubova, 21 saylı Mediasiya Təşkilatının direktoru Zaur Mirzəbayov, Qaradağ Rayon Ağsaqqallar Şurasının sədri Ramin Məmmədov və digər şəxslər, XX əsrin sonlarında Azərbaycanın qarşılaşdığı çətinliklərdən, vətəndaş müharibəsi təhlükəsindən və iqtisadi çöküşdən danışıblar. Onlar Ulu Öndər Heydər Əliyevin xilasedici rolunu xüsusi qeyd ediblər.
Tədbirin sonunda YAP-a yeni daxil olanlara üzvlük vəsiqələri təqdim edilib.
