“Rabitəbank” Açıq Səhmdar Cəmiyyətinin (ASC) müştərilərindən biri, hesabındakı vəsaitlərin silinərək Türkiyədə bir obyektin hesabına köçürüldüyünü iddia edir. Bu müştəri baş verənlərə görə bankı günahlandırır. O, vurğulayır ki, hesab kartının nömrəsini özündən və bankdan başqa heç kəs bilməyib. Müştəri bildirir ki, özü Türkiyədə oteldə olmayıb və ödəniş etməyib, buna görə baş verənlərin bankın qüsuru olduğunu düşünür.
Bizimyol.info xəbər verir ki, “Rabitəbank”ın müştərisi Maksim Sandurskiy başına gələnlərə görə bankı məhkəməyə verib. İddia ərizəsində o, həm maddi, həm də mənəvi ziyanın ödənilməsini tələb edir.
Sikayətçi, bir neçə ildir ki, bu bankın müştərisidir. Günlərin birində onun kartına dört dəfə müdaxilə edilib və hissə-hissə olmaqla, 240 manat pul çıxarılıb. Araşdıranda görüb ki, çıxarılan pul Türkiyənin Çorum şəhərindəki bir otelin hesabına köçürülüb. O, “Halbuki, nə mən orada olmuşam, nə də mənim kart hesabımı bankdan başqa kimsə bilir. Bank haqqında qaydalara görə, mənim kartıma müdaxilənin qarşısı alınmalı idi. Amma bunu etməyiblər” deyir.
İddiaçı, baş verənlərdən sonra bankla əlaqə saxlayaraq, məsələnin araşdırılmasını, günahkarların cəzalandırılmasını, kartından çıxan vəsaitin geri qaytarılmasını və bunu icra edən şəxslər haqqında hüquq-mühafizə orqanlarına məlumat verilməsini istədiyini bildirir. “Lakin bank əməkdaşları cinayət yolu ilə mənim bank kartımdan çıxarılan pulun kim tərəfindən çıxarılması barədə araşdırma aparılmasını xahiş etdikdə, məndən xidmət haqqı adı ilə əlavə 30 manat pul tələb edildi,” - deyir. Onun sözlərinə görə, bankın səhlənkarlığı nəticəsində ziyan çəkilməsinə baxmayaraq, dəfələrlə müxtəlif instansiyalara, o cümlədən polis idarəsinə müraciət etməsinə baxmayaraq, “Rabitəbank” dəymiş ziyanın ödənilməsi üçün heç bir tədbir görməyib.
“Sonradan bildirildi ki, iş üzrə araşdırma aparılması üçün əlavə vəsait ödəməliyəm. Əks halda, mənə vurulmuş ziyanı qaytarmayacaqlar. Mən də etiraz etdim. “Rabitəbank” rəhbərliyi və əməkdaşlarının səhlənkarlığı nəticəsində sarsıntı keçirmişəm,” - deyə əlavə edir. O, məhkəmədə bankdan maddi ziyana görə 240 manat, mənəvi ziyan üçün isə 1000 manat təzminat istəyib.
“Rabitəbank” ASC müştərinin iddiası ilə razılaşmır. Bankın nümayəndəsi ehtimal edir ki, müştəri əvvəllər hansısa ödəniş əməliyyatları zamanı kart nömrəsini xarici saytda yazıb və beləliklə, üçüncü şəxslər tərəfindən ələ keçirilib. Kartın nömrəsi həmin il POS terminalda yazılıb və vəsait silinib. Nümayəndə deyir: “Müştəri bu dələduzluq əməliyyatlarını vaxtında aşkar edəndə dərhal tədbir görməliydi. Ən azı, Mobile tətbiqi / Bank / Azericard vasitəsilə kartını bloklamalı idi. Müştəri Chargeback (etiraz) sorğusu ilə banka müraciət etməli idi. Heç birini etməyib. Müştəri 30 manat komissiya qarşılığında sözügedən əməliyyatların geri qaytarılması üçün banka hansı şəkildə müraciət edilməli olduğunu bildirdikdə, kartını blok etməyib, etiraz sorğusu ilə banka müraciət etməyib,” - deyə bank nümayəndəsi bildirib.
Nümayəndə əlavə edib ki, artıq uzun müddət keçdiyinə görə vəsaitin geri qaytarılması ilə bağlı bank heç bir tədbir görə bilmir.
“Rabitəbank”ın nümayəndəsi müştərisinin nə maddi, nə də mənəvi ziyanla bağlı hissədə iddiasının təmin olunmamasını xahiş edib. Lakin məhkəmə belə nəticəyə gəlib ki, Maksim Sandurskiy kartından xəbərsiz şəkildə çıxarılan pulu tələb etmədə haqlıdır. Bu səbəbdən də maddi ziyanla bağlı hissədə iddianın təmin edilməsi və 240 manatın karta geri qaytarılması barədə qərar çıxarılıb. Lakin, 1000 manatlıq mənəvi ziyan tələbi təmin olunmayıb. Bununla belə, hakim müştərinin məhkəməyə müraciəti üçün ödədiyi 30 manat rüsumunu bankın üzərinə qoyub.
```
