Azərbaycan Respublikasının Prezidentinin “Heyvan kəsimi fəaliyyətinin tənzimlənməsi haqqında” müvafiq Sərəncamının icrası məqsədilə müasir tələblərə uyğun heyvan kəsimi məntəqələrinin yaradılması, baytarlıq-sanitariya normalarına cavab verməyən yerlərdə heyvan kəsimi hallarının qarşısının alınması istiqamətində Qida Təhlükəsizliyi Agentliyi (AQTA) aidiyyəti dövlət qurumları ilə birlikdə tədbirlərini davam etdirir.
Arazmedia.az-ın məlumatına görə, agentliyin fəaliyyəti başladığı dövrdə ölkə üzrə müasir baytarlıq-sanitariya tələblərinə uyğun kəsim məntəqələrinin sayı 15 olsa da, müvafiq qurumlarla birgə görülmüş işlər nəticəsində bu rəqəm hazırda 102-ə çatdırılıb. Agentliyin məlumatına görə, hələ də ölkənin bəzi rayonlarında, o cümlədən İmişli, Beyləqan, Saatlı, Sabirabad və bir sıra digər rayonlarda qanuni heyvan kəsimi məntəqələrinin təşkili istiqamətində gecikmələr mövcuddur.
Bu rayonlarda heyvandarlıq sahəsinin inkişaf etməsinə baxmayaraq, qanuni heyvan kəsimi məntəqələrinin olmaması heyvan sağlamlığının izlənilməsi və biotəhlükəsizliyin təmin olunması istiqamətində maneələrin yaranmasına səbəb olur. Bununla bağlı AQTA bu sahədə fəaliyyət göstərən sahibkarlara, həmin ərazilərdə qanunvericiliyə uyğun yerli heyvan kəsimi məntəqələrinin yaradılmasını təşviq edir. Həmçinin, sahibkarlar heyvan kəsimi məntəqələri yaratmaq üçün rayon icra hakimiyyətlərinin, mütəxəssislər tərəfindən metodiki kömək və baytarlıq-sanitariya normaları ilə bağlı məlumatlar əldə etmək üçün AQTA-nın regional bölmələrinə müraciət edə bilərlər.
Bu tədbirlər, ölkənin heyvandarlıq sektorunun keyfiyyətinin artırılması, heyvan sağlamlığının qorunması və əhalinin təhlükəsiz qida ilə təmin edilməsi üçün əhəmiyyətlidir. Təşkil olunan heyvan kəsimi məntəqələrinin müasir tələblərə uyğun olması, kəsim prosesi zamanı baytarlıq-sanitariya normalarının təmin olunması, sağlam heyvanların kəsim üçün qəbul edilməsi, insan sağlamlığı üçün risklərin azaldılması məqsədini güdür.
Təsadüfi deyil ki, heyvandarlıq sahəsində inkişafın təmin olunması və heyvan kəsimi fəaliyyəti üçün müasir yanaşmaların tətbiqi ölkənin qida təhlükəsizliyinə müsbət təsir edir. AQTA-nın həyata keçirdiyi tədbirlər, sahibkarların heyvan kəsimi sahəsində fəaliyyətini asanlaşdırmağa yönəlmişdir. Nəticə etibarilə, bu proseslər yerli istehsal sahəsinin inkişafına, məşğulluğun artmasına və kənd təsərrüfatının müasirləşməsinə də böyük təsir göstərəcəkdir.
