İqtisadiyyat Nazirinin İslam İnkişaf Bankı (IsDB) Qrupunun Müdirlər Şurasının Sədri Təyin Olunması

İqtisadiyyat naziri Mikayil Cabbarov, İslam İnkişaf Bankı (IsDB) Qrupunun Müdirlər Şurasının sədri təyin edilib. Bu barədə Nazirlikdən məlumat verilib. Təyinatla bağlı IsDB Qrupunun illik toplantısı çərçivəsində ev sahibliyini təhvil alma mərasimi keçirilmişdir. Beləliklə, IsDB Qrupunun 2026-cı ildə illik toplantısı Azərbaycanda təşkil olunacaq.

Mikayil Cabbarov, IsDB Qrupuna və üzv dövlətlərə Azərbaycana göstərilən yüksək etimada görə təşəkkür edib. O, bildirib ki, Azərbaycan 2010-cu ildə Bankın 35-ci illik toplantısına uğurla ev sahibliyi edib. Nazir vurğulayıb ki, bu nüfuzlu tədbirə növbəti dəfə ev sahibliyi etmək, Azərbaycanın çoxşaxəli əməkdaşlığı, üzv ölkələri birləşdirən ortaq dəyərləri və məqsədlərə sadiqliyini bir daha təsdiqləyir. O, tədbirin Azərbaycanın İslam maliyyə institutları ilə tərəfdaşlığının gücləndirilməsinə və dayanıqlı iqtisadi inkişafa təkan verəcəyini qeyd edib.

Naşir, Azərbaycan ilə IsDB arasında səmərəli əməkdaşlıq olduğunu, indiyə qədər birgə enerji, su təchizatı, infrastruktur, səhiyyə və digər istiqamətlərdə dəyəri təxminən 1 milyard ABŞ dolları olan layihələrin icra edildiyini vurğulayıb. Xüsusilə, işğaldan azad olunmuş ərazilərdə Bankla birgə həyata keçirilməsi nəzərdə tutulan “Qız qalası” su anbarından suvarma kanalının çəkilməsinə dair layihənin önəmi qeyd edilib.

Gələn il Azərbaycandakı illik toplantı çərçivəsində IsDB-nin Müdirlər Şurasının 51-ci, Beynəlxalq İslam Ticarət və Maliyyə Korporasiyasının Baş Assambleyasının 22-ci, İnvetsisiya və İxrac Kreditlərinin Sığortası üzrə İslam Korporasiyasının Müdirlər Şurasının 33-cü, Özəl Sektorun İnkişafı üzrə İslam Korporasiyasının Müdirlər Şurasının 26-cı, İnkişaf üzrə İslam Həmrəylik Fondunun Baş Assambleyasının 19-cu illik toplantıları keçiriləcək.

Tədbirdə IsDB Qrupunun Azərbaycanda keçiriləcək illik toplantısı üçün təminatlara dair Anlaşma Memorandumu imzalanıb. Sənəd, 2026-cı ildə Bakıda keçiriləcək illik toplantının səmərəli planlaşdırılması və təşkili məqsədilə əməkdaşlıq çərçivəsini müəyyən edir.

1973-cü ildən yaradılmış IsDB-nin baş qərargahı Səudiyyə Ərəbistanının Ciddə şəhərində yerləşir. İqtisadiyyatın müxtəlif istiqamətləri üzrə maliyyələşməni həyata keçirən IsDB Qrupu, Beynəlxalq İslam Ticarət və Maliyyə Korporasiyası, İnvetsisiya və İxrac Kreditlərinin Sığortası üzrə İslam Korporasiyası, Özəl Sektorun İnkişafı üzrə İslam Korporasiyası, İnkişaf üzrə İslam Həmrəylik Fondu kimi strukturlara malikdir. 57 ölkə Bankın üzvüdür, Azərbaycan isə 1992-ci ildən Banka üzv olub.