Azərbaycanın Xarici Siyasəti: Özbəkistan İlə Münasibətlər

Azərbaycan beynəlxalq aləmdə müstəqil xarici və daxili siyasət kursu, regional təşəbbüsləri, sülh və əməkdaşlığa verdiyi töhfələr sayəsində nüfuzunu getdikcə artırır. Azərbaycanın təşəbbüsü ilə həyata keçirilən genişmiqyaslı enerji, nəqliyyat və logistika layihələri yalnız respublikamızın deyil, eyni zamanda demək olar ki, bütün regionun inkişafı və rifahı üçün strateji əhəmiyyət daşımaktadır.

Azerbaycanın xarici siyasətində Mərkəzi Asiya ölkələri, xüsusilə də Özbəkistan ilə münasibətlərin inkişafı mühüm yer tutur. Mərkəzi Asiyanın ən böyük dövlətlərindən olan sürətlə inkişaf edən Özbəkistan ilə Azərbaycan arasında əlaqələr, xüsusilə son illərdə durmadan inkişaf edir və genişlənir.

Respublikamız bu ölkə ilə əlaqələri həm ikitərəfli, həm də çoxtərəfli platformalarla, o cümlədən Türk Dövlətləri Təşkilatında intensiv şəkildə inkişaf etdirir. Bu günlərdə Özbəkistan Prezidenti Şavkat Mirziyoyevin ölkəmizə dövlət səfəri, şübhəsiz ki, strateji və tarixi əhəmiyyət kəsb edir. Bu, Özbəkistan Prezidentinin son 3 il ərzində Azərbaycana altıncı səfəridir, bunlardan ikisi dövlət səfəridir.

Azerbaycan və Özbəkistan arasında qarşılıqlı münasibətlərin tarixi uzaq əsrlərə gedib çıxır. Özbək və Azərbaycan xalqlarını yaxın milli adət və ənənələr, ümumi dil qrupu, mədəniyyət və din birləşdirir. Bu gün 40 mindən çox azərbaycanlı Özbəkistan cəmiyyətinin sosial, ictimai, iqtisadi və digər sahələrində fəal iştirak edir.

İki ölkə arasında diplomatik əlaqələr isə 1995-ci ilin oktyabr ayında qurulmuşdur. 1996-cı ilin ortalarında Azərbaycanın Özbəkistan Respublikasında, 1998-ci ilin may ayında isə Özbəkistan Respublikasının Azərbaycanda səfirlikləri fəaliyyəti başlamışdır.

Prezident İlham Əliyev 2025-ci il iyulun 2-də Özbəkistan Prezidenti Şavkat Mirziyoyevin Azərbaycana səfəri zamanı mətbuata bəyanat verib. Cənab Prezident çıxışında ötən il Daşkənddə Azərbaycan və Özbəkistan arasında Müttəfiqlik münasibətləri haqqında müqavilə imzalandığını bir daha nəzərə çatdırıb. O, qeyd edib ki, "Bu gün Özbəkistan və Azərbaycanın münasibətlərinin tarixində əlamətdar gündür."

Özbəkistan Prezidentinin dövlət səfəri zamanı iki ölkə arasında əməkdaşlıq sənədləri imzalanmışdır. İlham Əliyev, Özbəkistanın idman sahəsindəki yeni uğurlarını da qeyd edərək, futbol üzrə Özbəkistan millisinin dünya çempionatının final mərhələsinə çıxmasını tarixi nailiyyət adlandırıb. O, bu uğurun təsadüfi olmadığını bildirib.

Səfərin sonunda, İlham Əliyev, Özbəkistan Prezidenti Şavkat Mirziyoyevə kənd təsərrüfatı, xüsusilə pambıqçılıq və ipəkçiliklə bağlı layihələrə sərmayə qoyduğuna görə xüsusi minnətdarlıq ifadə edib. O, qeyd edib ki, "Özbəkistan şirkətlərinin bu sahədə təcrübəsi bizim üçün çox qiymətlidir."

Özbəkistan Prezidentinin Azərbaycana dövlət səfəri çərçivəsində Bakıda "Özbəkistan" parkının təməlloqma mərasimi və Özbəkistanın Azərbaycandakı səfirliyinin yeni inzibati binasının açılışı da xüsusi əhəmiyyət kəsb edir.

Özbəkistan ilə Azərbaycanın dostluq münasibətləri zamanla daha da möhkəmlənir və iki ölkə arasında bir sıra yeni layihələr həyata keçirilir. Bu, həm siyasi, həm də iqtisadi sahələrdə rayonların inkişafına yönəlmiş proqramların göstəricisidir.

Səfərin nəticələri hər iki ölkənin gələcək əməkdaşlığında yeni bir səhifə açır və regional inkişafın vacib bir əsası kimi xidmət edir.

Şahla Ağbulud
AYB Abşeron bölməsinin sədri