Rusiya-Azərbaycan Gərginliyi və Milyarderlərin Rolu

Rusiya ilə Azərbaycan arasında görünməyən gərginliyin informasiya sızması fonunda iki məqam diqqət çəkdi. Birincisi, Rusiya Federal Məhkəməsi İcraçılar Xidmətinin (FSSP) Araz Agalarov barəsində icraata başlamasıdır. Bu xəbər ilk baxışda texniki məhkəmə proseduru təsiri bağışlaya bilər. Lakin bu "kartoteka" sənədlərinin arxasında daha böyük oyunlar gizlənir, xüsusilə də indiki mürəkkəb siyasi kontekstdə.

Formal səbəb borc mübahisəsi kimi təqdim edilsə də, prosesin zamanlaması və Kremlin son davranışları göstərir ki, məsələ təkcə maliyyə ili ilə məhdudlaşmır. Araz Agalarov, 1.7 milyard dolları olan "Crocus Group" imperiyasının sahibi və Rusiyanın ən böyük tikinti, əmlak və infrastruktur baronlarından biridir. Həmçinin, o, Azərbaycana bağlılığı ilə tanınır və köklərini, kimliyini, Azərbaycan dövlətinə və xalqına hər zaman açıq dəstək nümayiş etdirən azərbaycanlı milyarderdir. Agalarovların adı bu illər ərzində yalnız kommersiya layihələrində deyil, Azərbaycanın haqq işinin müdafiəsində, Qarabağ münaqişəsi dövründə Bakı ilə siyasi-mənəvi-maddi dəstək cəbhəsində də ön səralarda olub. Araz Agalarovun oğlu, Emin Agalarov bu bağlılığın daha canlı simvoludur. Başqa sözlə, Agalarovlara qarşı atılan addım Azərbaycana verilən mesajdır.

İkinci xəbər isə azərbaycanlı milyarderlərlə bağlıdır. Söhbət "Putinin dostu" kimi tanınan İlham Rəhimovdan gedir. Rusiya Yekaterinburq şəhərində Azərbaycan diasporasının Ural bölgəsi üzrə tanınmış lideri Şahin Sixlinski həbs edilir və qısa müddət sonra azadlığa buraxılan həmyerlimiz bu barədə açıqlama verir: "Mən azadlığımın qorunması üçün, həmçinin Rusiyada yaşayan Azərbaycan diasporasının təhlükəsizliyi və hüquqları naminə göstərdiyi xidmətlərə görə iş adamı, hüquqsünas professor İlham Rəhimova minnətdaram. Mənim fikrimcə, İlham müəllim bu işə qarışmasaydı, Azərbaycan diasporu bu proseslərdən daha ağır zərər çəkə bilərdi və şəxsi mənim azadlığa çıxmağım da məhz onun müdaxiləsi ilə mümkün oldu." Hadisə mahiyyət etibarı ilə Azərbaycana qarşı növbəti informasiya diversiyasıdır. Araz Agalarova qarşı qondarma hüquqi təzyiq fonunda İlham Rəhimovun xilaskar və alicənab obrazının yaradılması hansı məqsədə xidmət edir? Belə çıxır ki, guya məhz bu şəxsdən Rusiyada yaşayan azərbaycanlıların taleyi asılıdır və o, bu məsələdə Azərbaycan prezidentindən də güclüdür. Bu, Rusiya xüsusi xidmət orqanlarının laboratoriyalarında hazırlanmış siyasi texnologiyadır.

Rusiyada azərbaycanlılara qarşı diskriminasiya siyasətinin arxasında kim dayanır? Əlbəttə, Vladimir Putin! Bəs onun dostu və silahdaşı azərbaycanlıları necə xilas edə bilər? Necə ola bilər ki, Kremlin bu qədər dövlətlərarası gərginliyin azalması üçün kiçik bir addım belə atmadığı zaman, cənab Rəhimovun sözü ilə xüsusi əməliyyatla həbs olunan həmyerlimiz azadlığa çıxır? Bunun da altyapısı kimi Azərbaycan mediası İlham Rəhimovun xilaskar obrazını Azərbaycan cəmiyyətinə sızdırır. Bəlkə də bu proses sadəcə Kremlin narazı azərbaycanlıları sakitləşdirmək üçün seçdiyi taktiki bir gedişdir — sanki "baxın, sizin də səsiniz eşidilir, sizin də təmsilçiniz var" görüntüsü yaratmaq üçün. İkisi bir yerdə, mətbuatda istədiyinizi edə bilərsiniz.

İlham Rəhimovun son təqdimatı təkcə "xilaskarlıq" missiyası yox, həm də özünü siyasi meydanda yenidən xatırlatma cəhdi kimi qiymətləndirilə bilər. Professor həm Moskvaya, həm də Bakıya göstərmək istəyir ki, hələ də "oyunun içindəyəm". Hələ də təsirli, nüfuzluyam. Hələ də Putinə eyni süfrə arxasında otura, onunla "işgüzar səhər yeməyi" yeyə bilərəm. Lakin bəziləri buna ehtiyatla yanaşır: əgər Rəhimov doğrudan da nüfuzu və iradəsi varsa və baş verənlərdən sıxıntı hiss edirsə — niyə o, dostu "Rusiya kralı"na zəng etmir? Niyə Kremlin repressiv maşınına qarşı açıq mövqe göstərmir? Edə bilmir. Çünki kuklalar yalnız onların sahibinin istəyini icra edə bilir.

Azər Talibov

AnXeber.az