Hazırda müxtəlif rayonlarda qeyri-sabit və yağıntılı hava şəraiti müşahidə olunur. Bəzi dağ çaylarında sel keçidi baş verir. Həmçinin, yağışlı və küləkli hava şərtlərinin yaxın günlər ərzində davam edəcəyi proqnozlaşdırılır. Bu vəziyyəti nəzərə alaraq, Fövqəladə Hallar Nazirliyi təhlükəsizlik qaydalarını bir daha xatırladır.

Sel və daşqından qorunmaq məqsədilə, insanların sel və daşqın təhlükəli ərazilərdən uzaq durması tövsiyə edilir. Bu təhlükə ilə üzləşdiyi halda, dərhal yaxınlıqdakı yüksəkliklərə qalxmaq çox vacibdir.

Eyni zamanda, ildirimlə bağlı təhlükələrdən qorunmaq üçün elektrik cihazlarını şəbəkədən ayırmaq, telefonla (sabit xətt, mobil, taksofon və s.) danışmamaq, açıq havada elektrik xətləri, ildirim ötürücüləri, navalçalar və antenalara yaxınlaşmamaq lazımdır. Hündür ağacların altında daldalanmaq da məsləhət görülmür. Avtomobildə olarkən, hərəkəti dayandıraraq sükan çarxını buraxıb ildırımın bitməsini gözləmək lazımdır.

Eləcə də, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq tövsiyə olunur. Elektrik dirəkləri və naqillərinin, hündür ağacların altından da dayanmamaq önəmlidir.

Bundan əlavə, güclü küləyin səbəb olduğu yanğınların söndürülməsi ilə bağlı yaranan çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusi diqqət yetirilməlidir. Kiçik həcmli gəmilər istifadəçiləri üçün isə, belə hava şəraitində dənizə çıxmanın qadağan olduğu bildirilir.

Yadda saxlayın: Qaydalara biganəlik - həyatımıza təhlükədir! Əgər təhlükə baş verərsə, 112-yə zəng edin!

Mənbə: Elektrik cihazlarını şəbəkədən ayırın, telefonla danışmayın – Xəbərdarlıq