Naxçivanda abonentlərin cibinə girməyə çalışmaq üçün yerli Dövlət Energetika Xidməti müxtəlif üsullardan istifadə edir. İddialara görə, bu xidmətin əməkdaşları ağıllı sayğaclara kənardan müdaxilə edərək, istifadə olunan elektrik sayını süni şəkildə iki, bəzən isə üç qat artırırlar. Bu barədə “Gündəlik Naxçivan”a yerli sakinlər məlumat veriblər.

Sikayətçilər bildirirlər ki, əvvəl kartlarına 20 manat yükledikdə, bir ay ərzində elektrikdən rahatlıqla istifadə edə bilirdilər. İndi isə, eyni cihazlardan eyni qaydada istifadə etsələr də, həmin məbləğ yalnız 15 günə yetir. Bəzi hallarda isə, karta yüklənən məbləğ bir gün sonra müəmma ilə yoxa çıxır.

Naxçivan şəhəri Qoçüstü Məhəlləsində yaşayan İslam Kərimov da sikayətçilərdəndir. O, qanunsuzluqun aradan qaldırılması üçün xidməti şikayət etdikdə, əsassız cavab alıb: “İlk öncə smart karta 20 manat yüklədiyimizdə, bir aydan artıq elektrikdən istifadə edə bilirdik. Evdə çox olmadığımız üçün elektrikdən də çox istifadə etmirik. Kondisionerimiz də yoxdur. İyun ayında karta 20 manat yüklədim, bir neçə gündən sonra işıqlar kəsildi. Sayğaca baxdım ki, limit bitib. Təcüb etdim, agentliyə zəng etdim. Dedilər ki, yəqin limiti keçmişsiniz və ikiqat yazılıb. Ayın sonu gəlib baxacaqlarını bildirdilər. Sonradan məlum oldu ki, sayğaclar elektron olduğu üçün agentlik firildaq edir, abonentləri soymaqla məşğuldur. Dəfələrlə zəng etməyimizə baxmayaraq, gəlib sayğaclara baxmırlar. Biz isə işıqlar yansın, yayda isitilən soyuducular işləsin deyə məcburuq ki, karta pul yükləyək.”

Şəhərin Tabriz küçəsində yaşayan S. Mehdiyev də Agentliyin son dövrlərdə qanunsuz şəkildə abonentlərin cibinə girməsindən şikayətlənir: “İşıqlarımız kəsilmişdi. Sayğacı yoxladım ki, limit yoxdur. Smart karta 10 manat pul vurdum. Gətirib sayğaca yüklədim, işıqlar yandı. Yarım saat sonra işıqlar yenidən söndü. Gedib yoxladım ki, limit yenə bitib. Agentliyə şikayət etdim. Dedilər ki, ayın axırı gələcək, baxacağıq. 10 manatı geri istədim, vermədilər. İşıqlar yansın deyə yenidən 10 manat yükləmişəm. 5 gün keçməsinə baxmayaraq hələ də maraqlanan olmayıb. Smart sayğaclara müdaxilə edib, abonentlərin cibinə girmək, istifadə etdikləri elektrik pulunu götürməkdədirlər. Vətəndaşların çoxunun isə bundan xəbəri olmur. Onlara “limiti keçmısən, ona görə çox işlədirsən” deyib aldatırlar. Şikayətlərə isə baxan yoxdur.”