Fövqəladə Hallar Nazirliyi, ölkədə gözlənilən küləkli və yağıntılı hava şəraiti ilə bağlı əhaliyə müraciət edib.

Arazmedia.az-a əsasən, Hilli Hidrometeorologiya Xidmətinin məlumatına görə, avqustun 30-da ölkə ərazisində güclü külək əsəcək, ayrı-ayrı bölgələrdə intensiv yağışlar yağıb, bəzilərində isə qısamüddətli sel hadisələrinin baş verməsi proqnozlaşdırılır.

Bu səbəbdən Fövqəladə Hallar Nazirliyi müvafiq təhlükəsizlik qaydalarını bir daha xatırladır. Güclü külək ərazisində yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəkləri və naqillərinin, hündür ağacların altında dayanmamaq tövsiyə olunur.

Eləcə də, kiçikhəcmli gəmilər üçün, bu hava şəraitində dənizə çıxmanın qadağan olduğu nəzərə alınmalıdır. Yay fəsli olduğu üçün insanların dənizə girdiyi müddətdə güclü küləkli havada çimərliklərdə olmaq təhlükəli olduğu məsələsini xatırladırıq.

Bundan əlavə, yağışlarla əlaqədar bəzi çaylarda mümkün sel və daşqın olaylarından qorunmaq üçün sel və daşqın təhlükəli ərazilərdən uzaq durmaq, bu təhlükə ilə üzləşdikdə dərhal yaxınlıqdakı yüksəkliyə qalxmaq tövsiyə edilir.

Həmçinin, ildirimlə bağlı təhlükələrdən qorunmaq üçün elektrik cihazlarını şəbəkədən ayırmaq, telefonla (sabit şəbəkə, mobil, taksofon və s.) danışmamaq, açıq havada olarkən elektrik xətləri, ildirim ötürücüsü, navalça və antenaya yaxınlaşmamaq, hündür ağacların altında daldalanmamaq, avtomobildə olduqda isə hərəkəti dayandıraraq sükanın yanında qalıb ildirim başa çatanadək gözləmək tövsiyə olunur.

Mənbə: Nazirlik küləkli və yağıntılı hava ilə bağlı əhaliyə müraciət etdi